Семейде BINOM мектебінің құрылысы басталды, екі ауруханаға жоба әзірленуде
Семейдің дамуы жөніндегі кеңесте облыс әкімі Берік Уәли «Абайға құрмет» акциясы аясындағы нысандардың құрылыс барысын, Бас жоспарды және іскерлік орталықтың егжей-тегжейлі жоспарлауын қарады.
Семейде «Абайға құрмет» акциясы аясында әлеуметтік, мәдени, білім беру және спорт нысандарының құрылысы жүргізілуде. Қалада BINOM мектебінің құрылысы басталып кетті, бірқатар ғимарат бойынша жобалау жұмыстары мен құжаттарды ресімдеу жалғасып жатыр.
Облыс орталығында 300 төсектік облыстық көпсалалы аурухана мен көпсалалы балалар ауруханасын салу жоспарлануда. Драма театры, стадион және өнер орталығы жобалары бойынша да жұмыс жүріп жатыр.
Кеңесте Семейдің Бас жоспарына және әкімшілік-іскерлік орталықтың егжей-тегжейлі жоспарлау жобасына ерекше назар аударылды. Жаңа нысандар құрылысының басталуы, жер учаскелерін ресімдеу және инженерлік желілерді тарту олардың уақтылы дайындалуына байланысты. Сонымен қатар жаңа іскерлік орталық нысандарын электр, жылу және сумен жабдықтау мәселелері бөлек талқыланды.
Бұл туралы Абай облысының әкімдігі хабарлады.
Источник: Абай облысының әкімдігі
