Семейдегі «Қосалқы станция №18» шағын ауданында жол жөнделіп, су құбыры тартылды

Абай облысының әкімі Берік Уәли Семейдегі «Қосалқы станция №18» шағын ауданында болды. Ол абаттандыру және инфрақұрылымды жаңғырту жұмыстарын қарап, тұрғындармен әңгімелесті.

Шағын аудан қала орталығынан 4 шақырым жерде орналасқан. Мұнда үш көппәтерлі тұрғын үй бар, 64 пәтерде 200-ден астам адам тұрады.

Екі жыл ішінде мұнда бірқатар жұмыс атқарылды. Былтыр контейнерлері бар қоқыс алаңы орнатылып, аялдама павильоны салынды. Биыл «KEGOC» АҚ есебінен екі шақырым жолға орташа жөндеу жүргізіліп, ұзындығы 4,4 шақырым орталық су құбыры тартылды. Балаларға арналған ойын және спорт алаңдары абаттандырылып, аулаларға жарық орнатылды.

Шағын ауданға №54 автобус қатынайды, оқушыларды №33 мектепке тасымалдау ұйымдастырылған. Облыс басшысының айтуынша, жұмыстар тұрғындардың өтініші бойынша орындалған.

Бұл туралы Абай облысының әкімдігі хабарлады.