Робот-ит Семей полициясының қатарында қызметке шықты

Абай облысында қоғамдық тәртіпті сақтау саласына заманауи технологияларды енгізу басталды. Енді Семейдің көшелері мен қоғамдық орындарында адамдармен бірге робот-иттер де қызмет атқарады.

Бұл ерекше құрылғыны полиция қызметкерлері алғаш рет қаланың орталық алаңында тұрғындарға таныстырды. Робот бірден қала тұрғындарының, әсіресе балалар мен жастардың назарын аударды. Полиция оның жұмысының үлгісін де көрсетті: робот-ит тәртіп бұзушыға жақындап, дауысзорайтқыш арқылы ол бұзған заң талаптарын жария етті. Бұл туралы Абай облысының полиция департаменті хабарлады.