Облыс әкімі Семейдегі вокзалды қайта жаңғыртудың баяулығы үшін мердігерді сынға алды
Берік Уәли мердігерлерге жұмыс қарқынын арттыруды және Семей теміржол вокзалын қайта жаңғырту жұмыстарындағы жұмысшылар санын бірнеше есе көбейтуді тапсырды.
Абай облысының әкімі Берік Уәли Семейдегі теміржол вокзalын қайта жаңғыртудың барысын тексерді. Ол мерзімді бұзғаны үшін мердігерді сынға алып, қатаң ескерту жасады.
Қайта жаңғырту жұмыстары өткен жылғы шілдеде басталған. Жобаға сәйкес ғимарат толық жаңартылып, аумағы кеңейтіледі. Жөндеу кезеңінде жолаушыларға арналған уақытша қызмет көрсету орындары ұйымдастырылды. Қазір нысанда екі ауысыммен 60 адам мен 8 бірлік арнайы техника жұмыс істеп жатыр. Қасбетті қаптау, витраждық әйнектер орнату, ішкі әрлеу және керамикалық плитка төсеу жұмыстары жүргізілуде. Сондай-ақ эскалаторларды монтаждау және перрон бөлігін жаңғырту жалғасып жатыр.
Әкім көптеген тұрғын вокзалдың ашылуын күтіп отырғанын, ал жұмыс қарқыны төмен екенін айтты. Оның сөзінше, үш апта бұрын нысанда жағдай дәл осындай болған, еш қозғалыс байқалмаған. Ол мердігерге қарқынды күшейтіп, жұмысшылар санын бірнеше есе арттыруды тапсырды. Жетекшілік ететін орынбасарға және бейінді басқарма басшысына құрылыс сапасын күн сайын бақылау міндеттелді.
Вокзалдарды жаңғырту Мемлекет басшысының тапсырмасымен «Қазақстан темір жолы» бағдарламасы аясында жүріп жатыр. Елде барлығы 124 вокзал жаңартылуда, оның 10-ы Абай облысында орналасқан.
Бұл туралы Абай облысының әкімдігі хабарлады.
Источник: Абай облысының әкімдігі
